انجمن شعر و ادب رها (میخانه)
شعر و ادبیات و کمی سیاست
انجمن شعر و ادب رها (میخانه)
شعر و ادبیات و کمی سیاستآیت نامداری
آقای "آیت نامداری" شاعر ایلامی، زاده‌ی سال ۱۳۵۱ خورشیدی، در ایوانغرب است.
تەڵعەت تاهیر
ماموستا "تەڵعەت تاهیر" شاعیری هاوچه‌رخی کورد
(۱)
خۆشەویستیم، پەیوەندى بە باشیتەوە نیە.
سبەینەى دووشەمە لەبەردەم سجنى مەحەتە ببینه
بە دوو لەتە کەبابى سارد و نانى تیرى بەفرمێسک تەڕکراو و پاکەتێک جگەرەى غەمدانەوە
پیرەژنێک چاوەڕێى بینینى ئازیزە بکوژەکەى دەکات.
(۲)
بەڵێ، ئه‌وان له ئێمه باشترن، سه‌ده و نیوێکه ئه‌م هه‌ساره‌یه به ده‌ست ئێمه‌وه‌یه..
ئه‌تۆم و کیمیاوی و کونی ئۆزۆن و توانەوەی بەستەڵەکەکان و بێدادی و شه‌ڕی زۆرتری لێکه‌وته‌وه:
که‌س بیستوویه‌تی: کرمێک ئیره‌یی به فڕینی کۆترێک ببات؟
پشیلەیەک خۆی به کۆمه‌ڵە جوجکەیەکدا بتەقێنێتە‌وه؟
بازێک ئه‌نفالی که‌روێشکه‌کانی کردووه؟
ئه‌سپێک به هێسترێکی گوتووه تۆ له‌بنه‌ماڵه نیت؟
ته‌گه‌یه‌ک هه‌بووه بزن بکاته سه‌بایا؟
قەت ڕوویداوە به هه‌شت گا ده‌ستدرێژی بکه‌نه سه‌ر مانگایه‌ک؟
تیمساحێک پێستی پیرەمێردێکی کردووە بە جانتا؟
بولبولێک بۆ دەسەڵاتی شێر چریکاندوویەتی؟
درەختێک کرێی ھێلانەی لە باوکی دوو بێچوو وەرگرتووە؟
نەورەسێک ھەر بۆ خۆشیی بە نارنجۆک ماسی گرتووە؟
سه‌گێکی تیرۆریست هه‌بووه؟
ماکه‌رێک هاوسه‌رگیری له‌گه‌ڵ نێره‌که‌رێکدا کردووه بۆ باشتر کردنی گوزه‌رانی؟
مامزێک بوختانی به ده‌می پڵنگێک کردووه بۆ وه‌رگرتنی ڕه‌گه‌زنامه؟
ئەوە ئێمەین لەگەڵ دوا دڵۆپی شیری دایک چیرۆکی دڕەندەییمان دەستپێدەکا و ئەولادەکانی دارستان دەکەین بە تابووت..
ئێمە ترسناکین، کەچی ئاگادارکردنەوە تەنھا لەسەر پاکەتی جگەرەکانماندا ھەیە!
(۳)
ده‌رگای ڕابردوو ده‌که‌یته‌وه؟
- مه‌ولانا خالیدی نه‌قشبه‌ندی به‌ره و به‌غدا شاربه‌ده‌ر کرا و له گه‌رمای تاقه‌ت پڕوکێنی شاره‌زووردا که‌س جامه دۆیه‌کی پێنه‌دا!
- که‌یفی جوانڕۆیی له ڕێی خۆشناوه‌تیدا به‌ره‌و ئه‌سته‌مبوڵ شاربه‌ده‌ر کرا و که‌س هێشووه ترێیه‌کی شه‌قڵاوه‌ی پێ ڕه‌وا نه‌بینی!
- حاجی قادری کۆیی، خۆی گوته‌نی:
(هه‌روه‌کو شارانی تر که‌س ئاشنای کۆیێ نه‌بوو
شوهره‌تی ئه‌بیاتی من خه‌ڵکی له‌سه‌ر کۆ کرده‌وه)
که‌چی به‌ره‌و باوه‌شی عوسمانیه‌کان به‌ڕێخرا به بێ ئه‌وه‌ی که‌س دوو ده‌نکه هه‌نجیری ته‌ق ته‌قی بۆ بخاته توێشووه‌که‌یه‌وه!
_ نالی کە لە شەوەزەنگی زماندا ، بە گوێدرێژە مل عەلەم ، مەیمون قەدەم ، شیرین قەڵەمەکەی : بارە تیشکی جوانی و رەوانبێژی دەگواستەوە ، ناچار بوو بە عەرەبی باسی جوانی شارەزوور بۆ شەریفی والی مەکە بکا.
- مسته‌فا به‌گی کوردی له‌سه‌ر خۆشه‌ویستی، له‌قه‌بی صاحێبقڕانی لێ سه‌ندرایه‌وه و به‌ره‌و ئێران و توران شاربه‌ده‌ر کرا تا ئه‌و ڕاده‌یه‌ی ناوی خۆی گۆڕی به (هیجری) و به ته‌وسه‌وه گوێی ڕاده‌دێرا بۆ سه‌دای ئه‌و قافڵانه‌ی فیرقه‌ت که ده‌یانگوت: سه‌ر قافڵه‌چی... یاره!
- ده‌رگای مێژوو مه‌که‌ره‌وه:
به‌و قه‌ڵه‌مه قامیشانه‌ی نه‌بوونه شمشاڵ...
بوونه حه‌یزه‌ران و نه‌وه‌کانی پێته‌مبێ کرا :
ئێمه خۆشنووسی نووسینه‌وه‌ی سڕینه‌وه‌ین.
(۴)
بەو گیتارەی سەدان جار بە خەیاڵ لە بەردەم ماڵەکەی ئێوەدا ژەندوومە، دەمویست لێنەگەڕێم پیر بیت..
تۆش کەیفت بە دڵسافیم دەهات و پێدەکەنیت و ڕۆژبەڕۆژ گەنجتر دەبوویتەوە
لەگەڵ ھەر غەدرێکی دنیا برینێک پەیدا دەبوو ناچار ژێیەکی گیتارەکەم دەپچڕاند و دەمکردە تەلی تەقەڵ و دەمدووریەوە، برینێکیتر و ژێیەکیتر و دەمدووریەوە.
ئاگام لە تۆ و لە خۆشم نەما، ئێستا پێچەوانەی یەکترین:
تۆ کوژایتەوەو منیش لەسەرمە ئەو هەموو سووتانە بگێڕمەوە..
گێڕانەوە بە ڕێزمانی ئەو ھێتیمەی لە قوتابخانە لەبارەی خۆشەویستی باوکەوە داوای ئینشای لێدەکەن.
(۵)
ئای چەند باشە
لە فێڵەکەی من نەگەیشتووە..
بۆ ئەوەی لە کۆتاییدا پێکەنینی ببینم،
بەئەنقەست هەموو گفتوگۆکانی لەگەڵدا دەدۆڕێنم
(۶)
[پایزی زەعیم]
کەس بیری نایە لەکەیەوە بۆتە زەعیم؟
ئەوەی زانراوە کەسێکی ئاسایی نیە!
دەتوانێ کانزاکانی ژێر زەوی بخوات و
پێدەشت بە دارستانەوە بجوێت و
ڕووبار هەڵقوڕێنێ و ئاسمان بخاتە باخەڵییەوە!
مێژوونووسەکانی دەڵێن:
توانای زەعیم لە ئەفسانەکانیش بەدەرە،
دەتوانێت بە فووێک چەندان وڵات بڕووخێنێ
بە هێمایەک مێژوو دروست بکا!
کارەبا دەخواتەوە و نالەرزێ!
نەوت دەخاتە گیرفانییەوە و ناڕژێ!
زەعیم ئەو ڕۆژنامەیە دەخوێنێتەوە،
کە خۆی بۆ خۆی دەری دەکا،
پێی سەیرە چۆن نووسەرەکان،
لەو (نەخێر)ە گەیشتبوون کە بیری چوو بوو بیڵێ؟
یان ئەو زۆڵانە چۆن زانییان مەبەستی لەو نەخێرە (بەڵێ) بوو؟
لە منداڵییەوە دوژمنی بیرکارییە
تێ ناگا چۆن هەموو ژمارەکان یەکسان نین بە یەک؟
وەک چۆن میللەتێک یەکسانە بە ئەو!
لە مێرد منداڵییەوە رقی لە فیزیایە!
خۆی گوتەنی: زەعیم پێویستە دوو تەمەنی هەبێ،
یەکێک بۆ پارە کۆکردنەوە و
یەکێک بۆ خەرجکردنی!
دروستکەری وەرزەکانە
بە قسەکانی بەهار دێنێ،
بە کردەوەکانیشی پایز!
زەعیم هەموو شتێکی لە پێناو ئێمەیە، ئێمەی بێ وەفا:
کارگەی جگەرەی داناوە بۆ ئەوەی بەدیار دەسکەوتەکانەوە بە بای دەین.
کارگەی کلێنسی داناوە فرمێسکی خۆشیی پێ بسڕین.
کارگەی دەرمانی داناوە و هێند پەرۆشە
لە گەچیش حەب دروست دەکا.
باخچەی کردۆتەوە تا بە پارەیەکی کەم منداڵەکانمان کەروێشک ببینن.
کەچی لە پاشملە دەچرپێنین:
لای ئەو..تەنیا پارە، ریوایەی سەحیحە.
لە ڕاستیدا هێند نەدارە، ئاو چییە ئاو؟
ئاو دەخاتە بتڵەوە و دەیفرۆشێ!
زەعیم ڕاستی لەدواوەی ناڕوا.
ڕاستی بۆتە فەرشی سوور و بەسەریدا گوزەر دەکا.
(۷)
باوکم کە لەگەرمای نیوەڕۆیاندا لە ئیش دەگەڕایەوە
لە دەرگاوە، لە نوقڵێکی رەنگاوڕەنگی گەورە دەچوو
لە خۆشییان خۆمان پێدادەدا و لە حەوشە وردو خاشمان دەکرد
دەبووە هەزار پارچەی بریسکەداری وەک شووشە
بەڵام تاکە شووشە کە بتوانین بە پێخواسی
کۆی کەینەوە!
گڵاڵەکردنی ئەم بابەتە: #زانا_کوردستانی